प्रभाग समिती ए व ई कार्यक्षेत्रात मतदान जनजागृती रॅलीचे आयोजन

 

वसई-विरार शहर महानगरपालिका 

                                                                              दि.२६/१२/२०२५     

*प्रभाग समिती ‘ए’ व ‘ई’  कार्यक्षेत्रात महानगरपालिकेमार्फत मतदान जनजागृती रॅलीचे आयोजन;*

*रॅलीमध्ये स्वच्छता कर्मचारी व स्वच्छता निरीक्षकांचा विशेष सहभाग*

      

वसई विरार शहर महानगरपालिका सार्वत्रिक निवडणूकीच्या अनुषंगाने वसई विरार शहर महानगरपालिका कार्यक्षेत्रात मा.आयुक्त श्री.मनोजकुमार सूर्यवंशी(भा.प्र.से) यांच्या निर्देशानुसार तसेच मा.उप-आयुक्त श्री.अजित मुठे यांच्या मार्गदर्शनाखाली स्वीप (SVEEP Activity) अंतर्गत मतदान जनजागृती मोहीम सुरु करण्यात आली आहे.  

मतदान प्रक्रीयेविषयी मतदारांमध्ये जागरुकता वाढावी, मतदान प्रक्रियेत नागरिकांचा सहभाग वाढून मतदानाची टक्केवारी वाढावी तसेच मतदानाच्या दिवशी सर्व मतदारांनी आपला मतदानाचा हक्क बजावून मतदान करावे, हा संदेश मतदारांपर्यंत पोहोचविण्यासाठी मतदार जागरुकता आणि सहभाग (SVEEP Activity) कार्यक्रमाअंतर्गत दि.२६ डिसेंबर २०२५ रोजी वसई विरार शहर महानगरपालिका प्रभाग समिती ‘ए’ बोळींज व प्रभाग समिती ‘ई’ नालासोपारा मार्फत जनजागृती रॅलीचे आयोजन करण्यात आले होते. या रॅलीमध्ये महानगरपालिकेतील स्वच्छता कर्मचारी व स्वच्छता निरीक्षक यांनी विशेष सहभाग घेतला होता. मतदानाविषयी जनजागृतीचे विविध घोषणांचे फलक हाती घेऊन मतदान जनजागृतीपर घोषणा देत सदर रॅलीद्वारे मतदारांना मतदान करण्यासाठी आवाहन करण्यात आले. यावेळी उत्सुक मतदारांनीही रॅलीत सहभाग घेतला.    

वसई विरार शहर महानगरपालिकेच्या दि.१५ जानेवारी २०२६ रोजी होणाऱ्या मतदानाच्या दिवशी सर्व मतदारांनी मतदान करून आपला मतदानाचा हक्क बजावावा असे आवाहन वसई विरार शहर महानगरपालिकेमार्फत काढण्यात आलेल्या या निवडणूक जनजागृती रॅलीद्वारे करण्यात आले. ही जनजागृती मोहीम मतदानाच्या दिवसापर्यंत सुरूच राहणार असून या मोहिमेत विविध उपक्रमांद्वारे मतदान जनजागृती करण्यात येणार आहे.