प्रत्येक निवडणूक हा एक नवीन अनुभव असतो यामुळे नियुक्ती अधिकारी कर्मचारी यांनी निवडणूक प्रक्रिये बाबतचे प्रशिक्षण घेणे आवश्यक मा.आयुक्त श्री मनोज कुमार सूर्यवंशी (भा. प्र.से)

वसई-विरार शहर महानगरपालिका

निवडणूक विभाग

दि.२७/१२/२०२५

*प्रत्येक निवडणूक हा एक नवीन अनुभव असतो; यामुळे नियुक्त अधिकारी कर्मचारी यांनी निवडणूक प्रक्रियेबाबतचे प्रशिक्षण घेणे आवश्यक _ मा.आयुक्त श्री.मनोजकुमार सूर्यवंशी (भा.प्र.से.)*

वसई विरार शहर महानगरपालिका सार्वत्रिक निवडणूक २०२६ करिता दि.१५ जानेवारी २०२६ रोजी होणारी मतदान प्रक्रिया सुरळीतपणे व बिनचूक पद्धतीने व्हावी, यासाठी मतदान केंद्रांवर नियुक्त करण्यात आलेल्या अधिकारी व कर्मचारी यांचे तीन दिवसीय प्रशिक्षण दि.२६/१२/२०२५ पासून जी.जी.कॉलेज, वसई (प.) येथे सुरू आहे.

आज दिनांक २७ डिसेंबर रोजीच्या प्रशिक्षणाला वसई विरार शहर महानगरपालिकेचे मा.आयुक्त तथा मुख्य निवडणूक अधिकारी श्री.मनोजकुमार सूर्यवंशी (भा. प्र.से.) यांनी भेट दिली. यावेळी मा.अतिरिक्त आयुक्त श्री.संजय हेरवाडे तसेच या प्रशिक्षणासाठी तज्ञ प्रशिक्षक म्हणून लाभलेले श्री.महेश पोंक्षे हे उपस्थित होते.

प्रशिक्षणास उपस्थित अधिकारी व कर्मचारी यांना संबोधताना मा.आयुक्त महोदयांनी सांगितले की प्रत्येक निवडणूक हा एक नवीन अनुभव असतो. यामुळे निवडणुकीचे प्रशिक्षण घेणे अत्यंत आवश्यक आहे. त्यामुळे मतदानाच्या वेळी कोणतीही अडचण उद्भवत नाही. याकरिता महानगरपालिकेमार्फत तीन दिवसीय प्रशिक्षण आयोजित करण्यात आले आहे. निवडणुक म्हणजेच लोकशाहीच्या या महोत्सवात सहभागी झालेल्या सर्व अधिकारी व कर्मचारी यांनी अभिमान बाळगून दिनांक १५ जानेवारी २०२६ पर्यंत या निवडणुकीच्या कामासाठी कुटुंबाप्रमाणे काम करून आपापली जबाबदारी योग्यरित्या पार पाडावी. यावेळी मा.आयुक्त महोदयांनी निवडणुकीच्या वेळी अधिकारी व कर्मचारी यांनी पार पाडण्याच्या जबाबदारी बाबत तसेच करावयाच्या कार्यवाही बाबत थोडक्यात माहिती देऊन मागील निवडणुकीच्या वेळी आलेले विविध अनुभव उपस्थितांना सांगितले. निवडणुकीवेळी उद्भवणाऱ्या विविध परिस्थितीत कोणत्या उपाययोजना कराव्यात याचे अनुभवासहित माहिती त्यांनी उपस्थितांना दिली.

संबोधनानंतर स्वतः मा.आयुक्त महोदयांनी प्रशिक्षणास उपस्थित अधिकारी व कर्मचारी यांच्या जागेवर जाऊन त्यांना निवडणुकीच्या व मतदानाच्या अनुषंगाने विविध प्रश्न विचारले, तसेच उपस्थितांशी निवडणुकीच्या व मतदान प्रक्रियेच्या विविध बाबींवर सविस्तर चर्चाही केली. मा.आयुक्त महोदयांनी सर्व उपस्थित अधिकारी व कर्मचारी यांना निवडणुकीच्या कामासाठी शुभेच्छा दिल्या.

वसई विरार शहर महानगरपालिका सार्वत्रिक निवडणूक २०२६ साठी एकूण २९ प्रभाग निश्चित करण्यात आले असून या प्रभागांमध्ये एकूण १४३२ इतकी मतदान केंद्र आहेत. या सर्व मतदान केंद्रांसाठी ७८५० इतक्या मतदान केंद्र अधिकारी व कर्मचारी यांची नियुक्ती करण्यात आली आहे. मतदानाची प्रक्रिया पार पाडण्यासाठी मतदान केंद्राध्यक्ष, मतदान अधिकारी १, २ व ३ यांना दि.२६ ते २८ डिसेंबर २०२५ मध्ये तीन दिवसीय प्रशिक्षण देण्यात येत आहे. प्रशिक्षणा दरम्यान अधिकारी व कर्मचारी यांना मतदान प्रक्रियेच्या माहिती सोबतच EVM मशीन चे प्रत्यक्ष प्रात्यक्षिक (Hands-on Training) ही देण्यात येत आहे.

Saturday, 27 December 2025