"पेल्हार पुलाखाली भीषण अपघात — बाप-लेकाचा जागीच मृत्यू, महामार्गावरील खड्डे बनले मृत्यूचे कारण?".
नालासोपारा परिसरातून पुन्हा एकदा मोठी दुर्घटनेची बातमी समोर आली आहे. मुंबईहून गुजरातच्या दिशेने जाणारा एक अनियंत्रित ट्रक पेल्हार पुलाखालील पेट्रोल पंपाजवळ आला असता, त्याने एका रिक्षाला आणि मोटरसायकलला जोरदार धडक दिली. या भीषण अपघातात रिक्षाचे पूर्णतः नुकसान झाले असून, रिक्षामधील बाप-लेकाचा जागीच मृत्यू झाला आहे. तर मोटरसायकलस्वार किरकोळ जखमी झाला आहे.
अपघाताची माहिती मिळताच पेल्हार पोलीस तत्काळ घटनास्थळी दाखल झाले आणि जखमीला जवळच्या रुग्णालयात हलविण्यात आले.
दरम्यान, एका प्रत्यक्षदर्शीने सांगितले की मुंबई-अहमदाबाद महामार्गावरील खड्डे आणि स्ट्रीट लाईट नसल्यामुळे अशा प्रकारच्या अपघातांची मालिका सुरूच आहे.
विशेष म्हणजे, याच ठिकाणी दोन दिवसांपूर्वी पेल्हार पुलावरून एक कंटेनर खाली कोसळला होता. त्या दुर्घटनेत दोन कार त्याच्या चपेटात आल्या होत्या, ज्यात एका महिलेला प्राण गमवावे लागले तर काही जण गंभीर जखमी झाले होते.
पेल्हार परिसरात सतत घडणाऱ्या या अपघातांमुळे नागरिकांत तीव्र नाराजी व्यक्त होत असून, संबंधित प्रशासनाने तात्काळ पावले उचलावीत, अशी मागणी होत आहे.
