नारंगी रेल्वे उड्डाण पुलाला गती देण्यासाठी आढावा बैठक
रेल्वे–PWD समन्वयातील अडचणींवर सखोल चर्चा; काम लवकर सुरू करण्याचे निर्देश
वीरार पश्चिमेकडील नागरिकांसाठी अत्यंत महत्त्वाचा ठरणारा नारंगी रेल्वे उड्डाण पूल (Railway Over Bridge) लवकरात लवकर सुरू व्हावा, यासाठी संबंधित सर्व यंत्रणांमध्ये समन्वय साधण्याच्या दृष्टीने महत्त्वपूर्ण बैठक पार पडली. या बैठकीत रेल्वे विभाग, सार्वजनिक बांधकाम विभाग (PWD) आणि अन्य संबंधित विभागांना येणाऱ्या अडचणींबाबत सखोल चर्चा करण्यात आली.
नवीन रेल्वे पुलाच्या कामास गती मिळावी यासाठी रेल्वे आणि PWD विभागाला भेडसावणाऱ्या तांत्रिक, प्रशासकीय व समन्वयातील अडचणी स्पष्टपणे मांडण्यात आल्या. या अडचणी सोडवण्यासाठी संबंधित इतर विभागांनी आवश्यक ती मदत व सहकार्य करावे, अशा स्पष्ट सूचना देण्यात आल्या आहेत.
या महत्त्वपूर्ण बैठकीस
नगरसेवक मा. प्रफुल्ल साने,
नगरसेवक मा. अजीव पाटील,
नगरसेवक मा. मार्शल लोपीस
यांच्यासह वसई-विरार महानगरपालिकेचे वरिष्ठ अधिकारी, रेल्वे विभागाचे अधिकारी, सार्वजनिक बांधकाम विभाग (PWD), वीज विभागाचे अधिकारी तसेच संबंधित ठेकेदार उपस्थित होते.
नारंगी रेल्वे उड्डाण पुलाचा प्रश्न गेल्या अनेक वर्षांपासून प्रलंबित असून, दररोज रेल्वे फाटकावर लागणाऱ्या प्रचंड वाहतूक कोंडीमुळे नागरिकांना मोठा मनस्ताप सहन करावा लागत आहे. विशेषतः शाळकरी मुले, नोकरदार वर्ग, रुग्णवाहिका आणि अत्यावश्यक सेवांना या कोंडीचा मोठा फटका बसतो.
बैठकीदरम्यान लोकप्रतिनिधींनी “नागरिकांचा संयम संपत चालला आहे” अशी भावना व्यक्त करत, हा प्रकल्प केवळ कागदावर न ठेवता प्रत्यक्षात उतरणे गरजेचे असल्याचे ठामपणे मांडले. तसेच विभागांमधील पत्रव्यवहार, परवानग्या, तांत्रिक मंजुरी आणि स्थलांतरित सेवांमुळे होणारा विलंब टाळण्यासाठी तातडीने निर्णय घेण्याची गरज अधोरेखित करण्यात आली.
रेल्वे, PWD, वीज विभाग व महापालिका यांच्यात समन्वय साधून अडथळे दूर करण्यासाठी एकत्रित कार्यपद्धती राबवण्याचा निर्णय या बैठकीत घेण्यात आला. ठेकेदारांकडूनही कामासंदर्भातील सद्यस्थिती मांडण्यात आली असून, आवश्यक मंजुरी मिळताच काम सुरू करण्याची तयारी दर्शविण्यात आली आहे.
दरम्यान, या बैठकीमुळे नारंगी रेल्वे उड्डाण पुलाच्या कामाला लवकरच प्रत्यक्ष सुरुवात होईल, अशी आशा वीरारकरांमध्ये निर्माण झाली आहे. वाहतूक कोंडीमुक्त वीरार हे स्वप्न प्रत्यक्षात कधी उतरणार, याकडे आता सर्वांचे लक्ष लागून राहिले आहे.
